كيف ظهرت النقود (الفلوس) وقصة تطورها عبر الزمن

كيف ظهرت النقود (الفلوس) وقصة تطورها عبر الزمن
      كتب:  Ebrahim H. Corleone‏| الكلمة| 
       
      كيف ظهرت النقود ؟ ما الفرق بين النقود الحقيقية والنقود المزيفة ؟ ما علاقة الذهب بطباعة العملة ؟ ولماذا إختفى الذهب من الأسواق كعملة ؟
      ظهور-النقود

      أسئلة بسيطة وفي نفس الوقت إجابتها تكاد تكون مجهولة للكثير من الناس، مع إن الإجابة على هذه الأسئلة ممكن يغير حياة إنسان ويدفعه من القاع إلي القمة.

      أولا : كيف ظهرت النقود ( الفلوس )؟

      تعالوا نرجع بالزمن لحقبة ما قبل التاريخ، تقريبا 4000 عام قبل الميلاد، وقت ما كان الناس عايشة حياة بدائية هادية، حياتهم كانت قائمة على الزراعة والأعمال الحرفية البسيطة بشكل أساسي.
      فى الفترة دي ماكنش في نقود بالمعني المتعارف اليوم تخليهم يقدروا يتعاملوا بسهولة فى البيع والشراء، ولكن كانوا معتمدين على نظام المقايضة.

      نظام المقايضة مرهق جدا وبيعتمد على الحظ بشكل كبير بحيث يتم تبادل السلع والخدمات بين الناس وبعضها بشرط إن الشخصين الى بيتعاملوا مع بعض لازم يتصادف إنهم يكونوا عايزين نفس الحاجات الى فى إيدين بعض فى نفس اللحظة !!
      أوضح أكثر:

      نفترض إن واحد من الناس معاه 2 كيلو أرز وحابب يشتري كيلو تفاح، يقوم ياخد الــ 2 كيلو أرز ويروح على بائع الفاكهة يقوله معايا 2 كيلو أرز، خدهم وإديني بدلهم كيلو تفاح، لسوء الحظ الفكهاني مش محتاج الأرز، يقوله هاتلي 2 كيلو بطاطس وأنا أديك كيلو تفاح، يقوم صاحب الأرز يروح على بائع بطاطس ويطلب منه يبدل 2 كيلو أرز بــ 2 كيلو بطاطس، لسوء الحظ تاني بائع البطاطس عنده أرز كافي ويقوله لا أنا محتاج 2 لتر لبن وأديك قصادهم البطاطس، يروح لبائع اللبن ويقوله عايز أبدل معاك 2 كيلو أرز قصاد 2 لتر لبن، واخيرا لحسن حظه يطلع بائع اللبن محتاج الأرز ويوافق على الصفقة.

      عشان فى النهاية بائع الأرز ياخد الـ 2 لتر لبن يبدلهم مع بائع البطاطس وياخد الــ 2 كيلو بطاطس يبدلهم مع الفكهاني عشان يبدل البطاطس بالتفاح الى محتاجه !! -_-
      لفة طويلة ومتعبة، وبتحصل كل يوم ومع كذا سلعة وخدمة بتنطلب.

      وبالتالي المشكلة دي دفعت الناس للتفكير فى حل نهائي، وبدأ كل مجتمع بشكل عام يستخدم سلعة معنية كــ وسيط تبادل ( نقود ) الكل يكون متفق عليها وقابلها.
      جربوا إستخدام التبغ، لاحظوا إن التبغ بيفسد بعد فترة طويلة من التخزين.

      جربوا إستخدام بعض المواشي، لاحظوا إن فى حاجات محتاجين يشتروها ولكن قيمتها بسيطة متستاهلش إني أبدل بيها بقرة أو خروف كامل !!

      جربوا إستخدام بعض المعادن زي الحديد والنيكل والنحاس، لاحظوا إن المعادن دي موجودة بكميات كبيرة وبالتالي قيمتها رخيصة وصعب حمل كمبيات كبيرة منها لأماكن بعيدة.

      مع مرور الزمن وتجربة أنواع كثيرة من السلع كوسيط للتبادل، الناس بدأت تستنتج معايير معينة تقدر تحدد بيها أنسب نوع من النقود يمكن إستخدامه،

      معايير النقود الجيدة :-

      1- وسيط للتبادل مقبول بين الناس كلها،،، يعني النقود الي يتم استخدامها الناس كلها توافق تتعامل بيها.
      2- وحدة حساب،،،  يعني وحدات الفلوس يبقى على كل وحدة رقم نقدر نحسب بيه سعر الحاجة الى هتشتريها.
      3- يمكن حملها بسهولة من مكان لأخر،، يعني الفلوس متبقاش تقيلة جدا فى حملها زي المواشي والحديد.
      4- تتحمل الزمن،، يعني الفلوس تعيش أطول فترة من الزمن، متفسدش زي التبغ، أو تموت زي المواشي.
      5- يمكن تقسيمها لوحدات،،، يعني الفلوس أقدر أقسمها لوحدات عشان أعرف أشتري بيها الحاجات الى سعرها رخيص.
      6- قابلة للتبادل،،، يعني لو معايا فى جيبي وحدة واحدة من الفلوس دي تساوي نفس الوحدة الى جيب حد تاني وتشتري نفس الكمية من السلع.
      7- مخزن للقيمة،،، يعني الفلوس تحافظ على قيمتها مهما عافى عليها الزمن، لو معايا وحدة واحدة من الفلوس أقدر أشتري بيها كيلو لحمة اليوم، بعد 20 سنة أقدر أشتري بنفس الوحدة كيلو لحمة بردك بدون تغيير.

      في فترة 3000 قبل الميلاد فى مصر القديمة، ظهرت أول شكل للنقود الحقيقية، كان المصريين بيستعلموا الذهب فى تعاملاتهم اليومية، ولكن للأسف قطع الذهب أيامها كانت غير متساوية القيمة ( الوزن ) وغير متطابقة فى درجة النقاوة ( مثلا عيار 18 ، عيار 21 )، والحكومة أيامها لم تتولى أمر صك الذهب كعملة رسمية وبقطع متساوية، ولكن الذهب فى حد ذاته معدن نفيس والكل بيقبله فى التعاملات وبيقدروا قيمته كويس، ولكن الناس حلت المشكلة دي بإستخدام ميزان لوزن الذهب وتحديد السعر بناء على الوزن والسلعة المطلوبة.

      بجانب الذهب أصبح الفضة فى المرتبة الثانية فى التعاملات اليومية، وإنتشر إستخدام الذهب والفضة فى الكثير من المجتمعات والحضارات.
      وبالتالي هذه أول مرة البشرية تستخدم فيها نقود حقيقية مناسبة وذات قيمة ( الذهب والفضة ).

      تقريبا فى الفترة بين 680 لــ 630 قبل الميلاد، ظهرت أول عملة ذهبية مصكوكة بشكل رسمي فى مملكة ليديا، موقعها الجغرافي كان فى الجنوب الغربي من آسيا الصغرى ( تركيا حاليا )،
      الموضوع مطولش كتير وإتنقل إستخدام العملات الذهبية المصكوكة من مملكة ليديا لليونان، وبعد كدا إنتشرت فى أغلب دول وممالك العالم.

      ولكن خلينا نركز شوية على اليونان القديمة ( أثينا )، إزدهرت إقتصاديا وقامت بتشييد المعابد والمباني الفخمة والأعمال العامة وأصبحت قوية سياسيا وتوسعت فى مستعمراتها وإمتداد سلطانها لحاد ما إصطدمت مع اسبرطة بسبب توسعها الإستعماري، وخلال الفترة بين 431 لــ 404 قبل الميلاد إندلعت الحرب البيلوبونيسية بين اليونان واسبرطة.

      ولأن اليونان إستنفذت كتير من مواردها المالية فى التوسع الجغرافي والعمراني وبسبب حاجة اليونان لتمويل الحرب قامت بجمع ضرائب كتيرة ( وطبعا كلها عملات ذهبية ) وبعدين سيحت العملات دي وخلطتها بمعدن النحاس عشان يضاعفوا الأموال الي جمعوها، وصرفوها على مرتبات الجيش وصناعة الأسلحة وإمدادات الغذاء للجنود، ومع إزدياد كمية العملات النقدية المخلوطة ( ذهب على نحاس ) بدأت الناس تلاحظ إختلاف القطع النقدية وبدأوا يحتفظوا بالقطع الذهبية ويستخدموا القطع المخلوطة فى البيع والشراء.

      مع الوقت حصل تضخم والأسعار زادت جدا وإنهزمت أثينا فى أكثر من معركة مع إسبرطة والأوضاع إزدادت سوء، وأخيرا إستسلمت أثينا لــ اسبرطة عام 404 قبل الميلاد وإنهارت أسطورة الحضارة الإغريقية للأبد.

      وبذلك من الأسباب الرئيسية لهزيمة أثينا هو إنهيار إقتصادها بإنهيار عملتها بسبب ترخيص قيمتها بخلط الذهب مع النحاس.
      ومنذ ذلك الحين ولحاد اليوم، يسجل التاريخ أن أى دولة رخصت قيمة عملتها الحقيقية وإستخدمت نقود غير الذهب والفضة، ما بتنتظر كتير إلى أن تنهار العملة وتختفي من السوق فى النهاية.

      عن كاتب المقال

      تامر مبارك| طبيب بشري، عندي موقع طبي، وهذا الموقع، أهوى التدوين منذ 2010


      إرسال تعليق

      @مرسلة بواسطة